Пензада мусулмонлар ва ғайридинлар ҳамкорлигида масжид бунёд қилинмоқда
Пенза вилоятининг Заречный шаҳарчасида мингдан ортиқ мусулмон истиқомат қилади. Лекин, уларда жамоат намозларини адо этиш учун ягона маскан шу кунгача йўқ эди. Мусулмонлар шаҳар маъмуриятига масжид қурилиши учун ер ажратиб бериш талаби билан бир неча бор мурожаат қилганлар, лекин уларнинг мурожаатлари жавобсиз қолаверган.
Мана бугунга келиб мусулмон жамоаси масжид биносига эга бўлдилар. Уларга масжид учун 82 квадрат метрли бинони ислом динига умуман алоқаси бўлмаган маҳаллий саҳоватли тадбиркор ҳадя қилди. У “инсонлар қайси дин ва миллат бўлишларидан қатъий назар муҳтож пайтларида бир-бирларига ёрдам беришлари шарт”, дея ҳисоблайди.
Маҳаллий мусулмонлар жамоаси етакчиси Рафаил Давидовнинг таъкидлашича, эндиликда бино намозхона ва тахоратхона тарзида қайта таъмирланиши зарур. Шу муносабат билан жамоат вилоят муфтийси Ислам ҳазрат Дашкинга ёрдам сўраб мурожаат қилди.
Масжид қурилиши ва минораларнинг ўрнатилиш лойиҳаси тузиб чиқилган. Намозхона биносида: ҳонақоҳ, тахоратхона, аёллар учун намозхона, болалар учун дарсхона ва бошқа қулайликларни яратиш режалаштирилган. Ҳозирда эркаклар учун намозхона ва тахоратхона қуриб битказилиб бўлинди.
