Allohning go‘zal ismlarini o‘rganamiz-2

Al-Vojid – Istagan narsasini, istagan vaqtida topuvchi. Bu ishda Unga hech narsa to‘sqinlik qilolmaydi. Uning qudrati yetmagan biror narsa yo‘q. Hamma narsa Unga tegishli. Xohlagan narsasini xohlagan paytda bajaradi, hech bir narsa Undan yashirinolmaydi.

Al-Mojid – Qadri ulug‘, shoni yuksak, ehson va himmati mo‘l Zot. Eng buyuk sharaf va izzat Unga xosdir. Bandalariga ko‘rsatadigan in’omu ehsonini so‘z bilan ifodalab bo‘lmaydi. Mo‘minlarni imon va solih amallarga muvaffaq aylaydi, keyin qilgan yaxshi ishlarini zikr qilib, madh etadi. Ularni dunyo saodatiga va oxirat salomatiga erishtiradi.

Al-Vohid – Yakka. Bitta. Bo‘linmas. U zotida, sifatlarida, ismlarida va hukmlarida aslo tengi va o‘xshashi topilmaydigan, yagona Allohdir. Rabbimiz hamma jihatdan tanho, hech bir borliqqa o‘xshamaydi, biror borliq ham Unga teng kelmaydi. Borligining boshlanishi bo‘lmaganidek, nihoyasi ham yo‘q. Yakkaligining dalillari yaratiqlarida yaqqol ko‘rinadi.