Va alaykum assalom. Ota-onaga yaxshilik qilish, ularni qarovsiz qoldirmaslik Dinimiz qat’iy talab etgan ishlardandir. Har bir mo‘min-musulmon banda ota-onasiga g‘amxo‘rlik qiladi, ularga muloyim muomalada bo‘ladi, mol-dunyosi bilan, tanasi bilan xizmatlarida qoim turadi.

Oq bo‘lish haqida gapiradigan bo‘lsak, bu juda ham og‘ir narsa. Oq bo‘lgan farzand jannatga kirish u yoqda tursin, hatto uning hidini-da hidlamasligi haqida hadislar bor.

Ulamolar aytishicha, ota-ona tili bilan “Oq qildim!” deyishi shart emas ekan. Ularning qalbi og‘risa, farzanddan qattiq ranjishsa ham oq tushar ekan. Shuning uchun, Allohga va oxirat kuniga ishonadigan har bir banda bu borada juda ehtiyot bo‘lishi kerak. Chunonchi, yaxshi yashash, farovon hayotga erishish va shu kabi havoyi narsalarni deb chet ellarga ketib qolish, ota-onasini yillab qarovsiz, mehrga muhtoj holida tashlab ketish juda ham noma’qul ishdir. Bu narsa, agar ota-onani nihoyatda ranjitadigan, ko‘ngillariga og‘ir botadigan bo‘lsa, farzandning oq bo‘lishiga sabab ekanini unutmaylik.