Hadya berishning fazilati
Rasululloh sollallohu alayhi va sallam marhamat qilib, dedilar: “O‘zaro hadyalashib turinglar, shunda bir-biringizga nisbatan muhabbatli bo‘lasiz” (Imom Buxoriy: “al-adab al-mufrad”).
Izoh: Hadya va sovg‘a ulashish nabaviy sunnat bo‘lib, u qalbdagi hurmat va muhabbat izhori, odamlar o‘rtasida uns va yaqinlik paydo bo‘lishining boisidir. U uzoqni yaqin qiladi, qarindoshlik yoki do‘stlik rishtalari uzilgan odamni qayta ulaydi. Kishilar o‘rtasida do‘stlik paydo qiladi. Nabiy alayhissalom odamlarni bir-biriga oshno qilib, gina-kuduratlarga barham beradigan barcha narsaga haris bo‘lganlar. Hadya taqdim qilish Nabiy alayhissalomning o‘zlari amal qilgan va boshqalarni ham targ‘ib qilgan go‘zal ishlardan biridir.