“Аёлимни қандай тийиб олсам бўлади?” 07.05.2018

Ассалому алайкум, муҳтарам илм эгалари. Саволим шундай: баъзан ғазабланиб турган пайтимда оғзимдан куфр чиқиб кетади, аёлим ҳам менга жавобан куфр ишлатади. Баттар ғазабланиб кетгач, авваллари туртиб қўйган пайтларим бўлди, лекин ўртага қайнотам ва қайнонам тушиб, қўл кўтариш яхши эмас эркакларга деб насиҳат беришди. Мен уларга қизингиз тилини тийса, мен қўл кўтармайман, десам қизим билан гаплашиб қўяман, дейишди. Мен ваъдамни устидан чиқдим, лекин аёлим тилини тийиш у ерда турсин баттар авжига чиқди. Қандай йўл тутишим керак бу ҳолатда? Икки ўғил фарзандим бор, балоғат ёшида. Эркаклик ғуруримга тегиб кетяпти бундай ҳолат. Маслаҳатингиз учун олдиндан миннатдорчилик билдираман!

Сабаби номаълум касаллик давоси.10.04.2018

Ассалому алайкум. Саволим шуки, мен нима иш қилсам ҳам, нимагадир қўл урсам ҳам, охирги пайтларда ҳаммаси чаппасига кетяпти. Нимадир қилмоқчи бўлсам, уддалай олмаяпман. Тез-тез касал бўладиган бўлиб қолдим. Касалхонадан кўрикдан ўтсам ҳаммаси яхши эканлигини айтишди. Ҳар хил нарсаларни ўйлайверадиган, сабабсиз сиқилаверадиган бўлиб қолдим. Нима бўлаётганини ўзим ҳам тушунмаяпман. Нима қилсам бўлади? Илтимос, тўғри йўл-йўриқ кўрсатинг. Олдиндан раҳмат!

Шерикларнинг бири ноҳақлик қилса, қандай йўл тутиш керак? 07.04.2018

Ассалому алайкум, қори ака. Мен сиздан бир ҳолат бўйича маслаҳат сўрамоқчиман: шерикчиликда 3 киши тенг харажат қилса-ю, лекин орасидан биттаси жуда ҳам кўп еб, ҳатто 1 кунда 5-6 маҳалдан ўртада қилинган харажатдаги егуликлардан еса, қолган 2 кишини ҳаққини еган ҳисобланмайдими? Агар гапирсак, бизга гуноҳ бўлмасмикан? Илтимос, шунга маслаҳат берсангиз!

“Гуноҳимни қандай ювсам бўлади?” 05.04.2018

Ассалому алайкум, азиз устозлар! Мен чамаси 2009-2012-йилларда магазинда сотувчи, кафеда бармен бўлиб ишлаганман. Шу ишлаган пайтларда кассадан сўрамасдан (ўғрилаб) пул олиб ишлатардим. 2012-йилнинг август ойида давлат (ГМ Узбекистан) ишига кирдим. Янги кирган маҳалларим ишимда ҳам, топган пулимда ҳам барака бўлмади. У пайтлар ичардим, сигарет, нос чекардим. Интизомий жазо ҳам олиб, ойлигимдан икки марта кесилди. Албатта, бу ўзимнинг айбим билан бўлган. Мана, чамаси бир ярим йилдан бери гуноҳларимга астойдил тавба қилдим, Аллоҳга минг бор шукр, беш вақт намозни канда қилмаяпман. Ишимда ҳам анча барака бор. Қазо намозларимни ҳам ҳисоб-китоб қилиб қўйганман. Уларни ўқиш ниятидаман. Лекин мени ҳалигача ўтган гуноҳларим (ўғрилик) хаёлимдан кетмаяпти. Кечалари ухлашдан олдин қабрдаги савол-жавобни эслашим билан ўша гуноҳларим кўз олдимга келади, қаттиқ қўрқиб кетаман. Илтимос, менга маслаҳат берсангиз! Аллоҳ илмингизни янада зиёда қилсин! Жавоб учун олдиндан раҳмат!

Ароқхўрни тўғри йўлга бошлаш 23.01.2018

Ассалом алайкум. Менинг дадам ичадилар. Қандай йул тутишни билмаймиз. Илтимос, маслаҳат беринг!