Ҳайит намози
"Шайх Зайниддин" жоме масжидида Қурбон ҳайити намози эртага 24 сентябр пайшанба куни соат 06:30 да ўқилади. Масжидга келувчи намозхонлар учун ҳайит намозининг ўқилиш тартиби билан таништирамиз.
Ҳайит намозини ўқиш тартиби қуйидагича: ҳайит намози ўқишга ният қилиб, такбири таҳрима айтилиб, қулоқ қоқилади. Сўнгра қўллар боғланиб, сано ўқилгач, уч марта такбир айтилади. Бу такбирлар “зиёда такбирлар”, дейилади. Ҳар бир такбирда қўллар кўтарилади, биринчи ва иккинчи такбирда қўлни ёнга тушириб, учинчисидан сўнг боғланади. Сўнгра овоз чиқармай “аузу” ва “бисмиллоҳ”ни айтгач, жаҳран (овоз чиқариб) Фотиҳа ва зам сура ўқилади ва рукуъ қилинади. Ҳайит намозининг дастлабки ракъатида Аъло, иккинчи ракъатда Ғошия сурасини ўқиш мандубдир. Иккинчи ракъатни “бисмиллоҳ” билан бошлаб, Фотиҳа ва зам сура ўқигач, биринчи ракъатда бўлганидек, қўлларни кўтарган ҳолда уч марта зиёда такбирлар айтилади. Учала такбирда ҳам қўллар кўтарилгач, ёнга туширилади ва тўртинчисида рукуъга борилади. Намоз ўқиб бўлингач, хатиб хутба ўқийди.
Ҳайит намозини имом билан бирга ўқий олмаган киши кейин қазосини ўқимайди. Ҳайит намозини ўқиш бирон узр туфайли фақатгина иккинчи кунга кечиктирилиши мумкин. Эслатиб ўтамиз, ҳайит намозидан аввал масжидда ва уйда, намоздан кейин эса масжидда нафл намоз ўқиш макруҳдир.
"Шайх Зайниддин" жоме масжиди матбуот хизмати