Исроф эмас, инсоф қилайлик!
Аллоҳ таоло мўминларни сифатлаб бундай марҳамат қилади: “Улар эҳсон қилганларида исроф ҳам, хасислик ҳам қилмаслар, (тутган йўллари) бунинг ўртасида – мўътадилдир” (Фурқон сураси, 67-оят).
Исроф чегарадан чиқиш, ортиқча ва меъёридан кўп харажат қилиш демакдир. Пайғамбаримиз соллаллоҳу алайҳи ва саллам: “Тежамкор одам камбағал бўлмайди”, деганлар (Аҳмад ривоят қилган). Аллоҳ таоло бизга ҳаёт, соғлик, оила, мол-мулк каби неъматлар инъом этган. Улардан қандай фойдаланганимиз, қаерга сарф қилганимиз ҳақида охиратда сўраламиз. Қуръони каримда бундай марҳамат қилинади: “Сўнгра ана ўша кунда (қиёматда), албатта, (сизларга ато этилган барча) неъматлар тўғрисида сўроқ қилинасизлар” (Такосур сураси, 8-оят).
Муқаддас динимиз барқарор ҳаёт кечириш учун тежамкор бўлиш ва исрофдан сақланишга буюради. Бунга амал қилган ота-боболаримиз ҳар бир неъматни эъзозлашган, уволидан қўрқишган. Аммо сўнгги пайтларда баъзилар тўй-маърака маросимларида ўзини кўз-кўзлашга, кимўзар мусобақасига ўтиб кетяпти. Амалларни бажаришда чегарадан чиқиб, савоб эмас, гуноҳ орттиришяпти.
Табиий газни, сувни ҳам исроф қиламиз. Баъзи хонадонларда газ пиликлари беҳуда ёниб, ичимлик суви жўмрак носозлиги ёки эътиборсизлик боис тинимсиз оқиб туради. Тузатишга шошилмайди, чунки жўмракни таъмирлашга пул кетади. Ана шу арзимас харажатдан қочиб, ҳар томчиси бебаҳо неъмат бўлган сувни увол қилишади, кимларнингдир насибасини қирқишади.
Баъзилар кўп ҳолда исрофдан сақланиш учун эмас, балки ҳисоблагич кўп ёзиб юбормасин, деб газ ва сувни тежашга ҳаракат қилишади. Мусулмон одам бундай дунёқарашдан воз кечиши керак. Динимизда “Исрофгарчиликка мутлақо йўл қўйманг!” (Исро, 26) деб буюрилгани учун исрофдан қайтсак, ҳам мақсадга эришамиз, ҳам савоб оламиз. Бу икки карра ютуқ бўлади.
Ўзбекистон мусулмонлари идорасининг “Йиллик тақвими” асосида тайёрланди