Келажак бор нарсами ёки...
Биз келажакни орзулар билан кенгайтириб юборамиз! Биз доим талпинадиган, унинг учун ўзимизни қийнаб, ўқдан чўққа урадиган нарсамиз бўлмиш – келажак нима ўзи у?
Талабалигимда менинг келажагим диплом олишда эди. Дипломни олгач, келажак ишга жойлашишга айланди. У ҳам бўлгач, келажагим энди оила қуриш, уй-жой тиклаш, насл қолдириш бўлиб қолди. Оила қуриб, фарзанду набиралар ҳам кўргач, келажагим ижодий юксалиш, мол-дунё йиғиш, машҳурлик, буюклик, китоблару мақолалар ёзишга айланди. Аллоҳнинг марҳамати ила ҳамма-ҳаммасига эришганимдан сўнг энди менда бирорта ўйлагулик келажак қолмади. Фақат бирдан бир келажакдаги орзуим – Аллоҳ таоло қалб кўзимни очиб, йўлимни кўрсатса эди, абадий келажак – ОХИРАТ – учун ҳам ишлаб олсам эди! Мен бундан бехабар қолибман. Афсус, умрим тугаб қолибди-ку, ғафлатда юрган эканман-а...
Ана, кўрдингизми? Бу дунёда “Келажак” дегани – йўқ нарса у. У ҳаргиз келмайдиган кун у. Чунки у келганида келажак бўлиб келмайди, балки бугунга, ҳозирга айланади. Уни кутиб юрган киши эса энди яна бошқа бир келажакни қидириб, ўшанинг ортидан югуриб юраверади.
Келажак у – отнинг эгарига боғланган ёғочга осилган бир боғ ем-хашакка ўхшайди. Хашак отнинг кўзи олдида худди, бироз бўйнини чўзса етиб оладигандек, ўзини кўз-кўз қилади. От эса унга етиб оламан деб, чопади. Хашак ҳам у билан тенгма тенг чопаверади. Натижада, от қанча чопиб югурмасин, барибир унга ета олмайди!...
Ҳақиқий келажак (барча орзуларнинг рўёби, ушалиши) – Охиратдадир. Бизнинг ичимизда у (Охират) учун бирор яхши амал қилаётган инсон борми? Уни қўйинг, У (Охират) ҳақида ўйлайдиган бирор киши бормикин?!
Муаллиф: Али Тантовий
Таржимон: Абу Ҳикматуллоҳ