Қийин аҳволда қолган киши айтадиган зикр

بِسْمِ اللهِ الرَّحْمَنِ الرَّحِيمِ وَلاَ حَوْلَ وَلاَ قُوَّةَ إِلاَّ بِاللهِ الْعَلِيِّ الْعَظِيمِ.

Дуонинг ўқилиши: “Бисмиллаҳир роҳманир роҳийм. Ва лаа ҳавла ва лаа қуввата иллаа биллааҳил ъалиййил ъазийм”.

Дуонинг маъноси: “Меҳрибон ва раҳмли Аллоҳ номи билан (бошлайман). Улуғ ва буюк Аллоҳдан ўзгада куч ва қувват йўқ”. Қуйидаги ривоятда мазкур дуони ўқиш фазилати ҳақида маълумот берилади.

عَنْ عَلِيٍّ رَضِيَ اللهُ عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: يَا عَلِيُّ أَلاَ أُعَلِّمُكَ كَلِمَاتٍ إِذَا وَقَعْتَ فِي وَرْطَةٍ قُلْتَهَا قُلْتُ: بَلَى جَعَلَنِيَ اللهُ فِدَاكَ كَمْ مِنْ خَيرٍ قَدْ عَلَّمْتَنِيهِ قَالَ: إِذَا وَقَعْتَ فِي وَرْطَةٍ فَقُلْ: بِسْمِ اللهِ الرَّحْمَنِ الرَّحِيمِ وَلاَ حَوْلَ وَلاَ قُوَّةَ إِلاَّ بِاللهِ الْعَلِيِّ الْعَظِيمِ فَإِنَّ اللهَ يَصْرِفُ بِهَا مَا يَشَاءُ مِنْ أَنْوَاعِ الْبَلاَءِ. رَوَاهُ ابْنُ السُّنِّيِّ فِي عَمَلِ الْيَوْمِ وَاللَّيْلَةِ وَالطَّبَرَانِيُّ فِي الدُّعَاءِ.

      Али розияллоҳу анҳу ривоят қилади: “Расулуллоҳ соллаллоҳу алайҳи ва саллам: “Эй Али, сенга мушкул аҳволга тушиб қолганингда айтадиган калималарни ўргатайми?” дедилар. Мен: “Ҳа, Аллоҳ мени сизга фидо қилсин! Менга қанча яхши нарсаларни ўргатдингиз!” дедим. У зот: “Агар қийин ҳолатда қолсанг, “Бисмиллаҳир роҳманир роҳийм. Ва лаа ҳавла ва лаа қуввата иллаа биллааҳил ъалиййил ъазийм”, десанг, Аллоҳ (ўша калималар) сабабидан ўзи хоҳлаган турли балоларни (сендан) даф этади”, дедилар” (Ибн Сунний “Амалул явми вал лайла”да ва Табароний “Дуо”да ривоят қилган). Мўмин банда бошига бирон мусибат тушса, юқоридаги дуони ўқийди. Ҳақиқий мўмин киши дунё ташвишлари, турли синовлар олдида ўзини йўқотиб қўймасдан, Аллоҳ мададига суянади.