Инсон сурати бор қабрлар ҳақида 19.09.2015
Савол:Ассалому алайкум, қори ака. Мўмин киши ўзи билмаган нарсаларни аҳли илмлардан сўраб олиши жоиз деб биламан. Шунинг учун сизга бир нечта саволим бор эди: ҳайкал, расм бор жойга фаришталар кира олмас экан, фақат Азроил фаришта кириши мумкин экан. Ҳозирда қабристонларда қабр устига маййитнинг ҳайкали ёки расмини қўйишмоқда. Бунда қабрдаги инсонни савол-жавоб қилгани келган фаришталар аҳволи қандай бўлади? Жавобингиз учун олдиндан раҳмат!
Булим Ақида5559
Ва алайкум aссалом. Ҳақиқатан, ит ва сурат бор уйга фаришталар кирмаслиги саҳиҳ ҳадисларда айтилган. Имом Нававий “Саҳиҳу муслим”га ёзган шарҳида: “Ит ва сурат бор уйга кирмайдиган фаришталар раҳмат, барака ва истиғфор фаришталаридир. Аммо ҳафаза фаришталари ҳар бир уйга киради. Улар одам боласи қилган ишларни номаи аъмолига ёзиб боради”, деган.
Шундан келиб чиқиб айтиш мумкин, ён атрофдаги қабр устида инсон сурати ёки ҳайкалининг бўлиши мункар ва накир исмли фаришталар бандани савол-жавоб қилишларига тўсқинлик қилмайди. Валлоҳу аълам!