Facebook ва Twitter тармоғидаги энг машҳур мусулмонлар
Яқинда чоп этилган Иордания Қироллик стратегик ислом таълими маркази эълон қилган “Жаҳоннинг энг обрўли мусулмонлари 500 талиги” китобида маълумот берилишича, Facebook тармоғидаги энг машҳур мусулмон германиялик 26 ёшли турк футболчиси Месул Ўзилдир. Германия терма жамоаси ва Англиянинг “Арсенал” клуби ярим-ҳимоячиси Месутнинг тармоқдаги мухлислари сони 28,7 миллион нафардан ошади.
Facebook тармоғидаги энг машҳур мусулмонлар рўйхатининг 2-ўрнини швециялик 34 ёшли хонанда Моҳир Зейн эгаллаб турибди. Асли Ливанда туғилган хонанда исломий қўшиқлари билан машҳурдир. Унинг тармоқдаги мухлислари сони 25,2 миллион нафардан ошади.
Ҳиндистонлик 48 ёшли бастакор А.Р. Раҳмон 21 миллиондан ортиқ мухлислари билан учинчи ўринда. А.Р. Раҳмон “Оскар” ва “Олтин глобус” мукофотлари совриндори.
Рўйхатнинг 4-қаторидан ўрин олган англиялик 22 ёшли хонанда Зайн Маликнинг мухлислари сони 20 миллион нафардан ошади.
37 ёшли мисрлик даъватчи ва телеюлдуз Мустафо Ҳусний 19 миллионлик мухлислари билан 5-ўринда. Саудия арабистонилик олим, қирол Сауд университети профессори Муҳаммад ал-Арифийнинг мухлислари сони ҳам 19 миллиондан ошади (6-ўрин). Мисрлик яна бир даъватчи Амр Холиднинг мухлислари ҳам 18 миллиондан ортиқ (7-ўрин).
Мисрлик хонанда Тамер Ҳусний (16 миллион мухлис, 8-ўрин) ва Амр Диаб (14 миллион мухлис, 10-ўрин), ҳиндистонлик актёр Амир Хон (15 миллион мухлис, 9-ўрин) кучли ўнликдан жой эгаллашган.
Facebook тармоғидаги энг машҳур қори қувайтлик Шайх Мишарий Рошид Ал-афасий бўлиб, унинг мухлислари сони 13 миллиондан ошади (11-ўрин). Энг машҳур мусулмон сиёсатчи эса Туркия президенти Ражаб Таййиб Эрдоғандир (8 миллион мухлис, 18-ўрин).
Twitter тармоғидаги энг машҳур мусулмонлар:
1. Зайн Малик – англиялик хонанда (16 миллион кузатувчиси бор).
2. Амир Хон – ҳиндистонлик актёр (15 млн).
3. Муҳаммад ал-Арифий – саудия арабистонилик олим (13 млн).
4. Аҳмад аш-Шуқайрий – саудиялик шоумен (12 млн).
5. Оиз ал-Қарний – саудиялик олим (10 млн).
6. Месут Ўзил – германиялик футболчи (10 млн).
7. А.А. Раҳмон – ҳиндистонлик бастакор (8 млн).
8. Шайх Мишарий Рошид Ал-афасий – қувайтлик қори (8 млн).
9. Салмон ал-Уда – саудиялик олим (7 млн).
10. Ражаб Таййиб Эрдоған – Туркия президенти (7 млн).
www.qadriyat.uz