Умар Ниассе: “Ибодатни ўтказиб юборсам—тун бўйи ухлай олмайман”

   Москванинг “Локомотив” футбол клуби хужумчиси, сенегаллик Байе Умар Ниасс қисқа давр ичида мухлисларнинг севимли футболчисига айланиб улгурди. У ҳаётда эришаётган муваффақиятларида Аллоҳнинг марҳамати ва ислом дини энг асосий сабаб эканини таъкидлайди. Футболчи ҳар куни тонг сахар бамдод намозига уйғонади, ўзи билан жойнамоз олиб юради, деб ёзади ИсламРевью.

«Мен 10 йилдан бери 5 вақт намозни канда қилмайман,- дейди спортчи. – Мободо бирор бир ибодат имконини ўтказиб юборсам, тун бўйи ухлай олмайман. Шунинг учун мен, агар машғулотларда банд бўлмасам, албатта беш вақт ибодат қиламан.” 

   Шунингдек, мусулмон футболчи спиртли ичимликлар ва тамаки маҳсулотлари чекишдан йироқ қилгани, ислом амалларини бажариб, ҳам руҳан, ҳам жисмонан соғлом бўлиб юргани учун Яратганга шукрона келтиришини қўшимча қилган.

   “Менинг яна бир мақсадим футболчи сифатида янада катта марраларга етиш ва дунёнинг энг кучли 10 та ўйинчиси қаторига кириш”, дейди “Локомотив” хужумчиси.

Қўшимча маълумот: Байе Умар Ниассе 1990 йил 18 апрелда Дакарда, кўп болали оилада туғилган. У дастлаб Сенгалнинг «Уакам» клубида футбол сирларини ўрганган. 2011 йилда «Уакам» билан Сенегал чемпионлигини қўлга киритган ва Норвегиянинг «Бранн» жамоасида ижара асосида тўп сурган.
   2013/14 йилги мавсумда Ниассе Туркиянинг «Акхисар Беледиеспоре» клубида фаолият юритиб, чемпионатда 40 та ўйин ўтказди. 2014 йил 25 май санасида Сенегал миллий терма жамоасида дебют қилди. Косова терма жамоаси билан ўтган ўйинда дубль қайд этди.
   2014 йил 28 июлда Москванинг “Локомотив” жамоаси билан шартнома имзолади.

Муслим Мирзажонов тайёрлади