Шифобахш кулонларни тақса бўладими? 16.03.2016
Савол:Ассалому алайкум, устоз. Аллоҳ илмингизга, умрингизга барака берсин!!! Устоз, viva group ва gano shifo туморларини тақиш хусусида маълумот берсангиз!
6595
Ваалайкум ассалом. Буни тумор ҳам деб бўлмайди. Чунки тумор деганда, кўздан асраш учун тақиладиган тақинчоқ назарда тутилади. Сиз сўраган нарса кўздан сақламайди. У биоэнергетик кулон (асл тош) бўлиб, фойдали қазилмалар аралашмасидан тайёрланади. Билишимча, бундай кулонлар одамдаги руҳий тарангликни камайтиради, тананинг табиий қувватини тиклайди, иммунитетни кучайтиради, қон айланишини яхшилайди, телефон, компьютер, телевизордан тарқалаётган нурлар зарарини камайтиради. Бунинг бидъат-хурофотлар билан боғлиқ жойи йўқ. Биоэнергетик кулонлар кўздан асрамайди, инсонни бахтли қилмайди. Фақат моддий-тиббий томондан фойда келтириши мумкин.
Энергетик кулонлар зийнат учун эмас, шифо ниятида тақилади.
Кейин, шунга ўхшаш нарсаларни харид қилаётганда, қараш керак: бу нима мақсадда чиқарилган, фойдаси борми, таркиби қандай?
Агар оддий ёғоч, пластмасса ёки темирдан ясалиб, “Бу бахт келтиради, кўздан асрайди”, деб “хусусият”лари ёзилган бўлса, ундай нарсаларни тақмаслик керак.