Қуръон ёдлаш бўйича маслаҳат берсангиз! 20.09.2016
Савол:Ассалому алайкум. Рухсат берсангиз, илмим етмаган нарсаларни сиздан сўрамоқчиман. Мен Қуръони каримни тажвид билан ўқийман. Энди ниятим, иншааллоҳ, Қуръон ёдлаш. Сиздан дуо ва маслаҳат сўрайман. Қайси вақтда ёдлаган афзал? Неча марта такрорланади? Аҳли илмлар бу борада қандай йўл тутишган? Бу сайтни ташкил қилганларни Аллоҳ Ўзи қўлласин!
Булим Маслаҳат10436
Ва алайкум ассалом. Қуръони каримни ёдлаш учун энг қулай вақт – саҳар ва тонг пайти. Чунки бу вақт баракалидир. Қолаверса, эрта тонгда олинган илм хотирада узоқ вақт сақланади.
Имкон қадар такрорни кўпроқ қиласиз. Агар 500 мартага чиқарсангиз, анча яхши ёдланади. Кейин Қуръон ёдлаб бўлгандан кейин доим такрорлаб туриш керак. Ёдланган сураларни намозда қироат қилиб турсангиз, янада пишиқ бўлади. Кейин иложи бўлса ёдлаган оятларингизни Қуръон борасида ўзингиздан билимлироқ бўлган қорилардан бирига ўқиб, кўрикдан ўтказиб олсангиз яна ҳам яхши бўлади. Бу иш бир томондан кишига рағбатлантирувчи омил бўлиб хизмат қилса, иккинчи томондан Қуръоний билимларингиз янада мустаҳкам бўлишига ҳам сабаб бўлади. Аллоҳ таоло барчамизни эзгу амалларда бардавом қилсин!