Ва алайкум ассалом ва раҳматуллоҳи ва барокатуҳ. Ислом дини инсоннинг қалби, танаси саломатлигига бирдек аҳамият қаратади. Қалбни иллатлардан тозалаш, дилни поклаш талаб этилганидек, танани касалликлардан ҳимоя қилиш, соғлом ва бақувват бўлиш ҳам динимиз даъват этадиган ишлардандир. Мисол учун, сузиш, отга миниш, камон отиш, кураш каби спорт турларига тарғиб қилинган. Бу ҳақда Пайғамбаримиз соллаллоҳу алайҳи ва саллам: “Фарзандларингиз сувда сузишга, отда чопишга в камондан отишга ўргатингиз”, деб марҳамат қилганлар.

   Шунингдек, бошқа бир ҳадиси шарифда бақувват одам Аллоҳ наздида афзалроқ экани таъкидланган. Абу Ҳурайра розияллоҳу анҳу Расулуллоҳ соллаллоҳу алайҳи ва салламдан ривоят қилади:“Кучли мўмин Аллоҳ учун заиф мўминдан яхшироқ ва севимлироқдир...” (Муслим, Ибн Можа ва Аҳмад ривояти).
Кучли мўминнинг иродаси мустаҳкам бўлади. Амру маъруф наҳий мункар қилишда ҳам бақувват киши жадалроқ ҳаракат қилади.

   Шунингдек, танаси соғлом одам бошига тушган мусибатларга чидайди, Аллоҳнинг ибодатига сабр қилади. Шундан келиб чиқиб, културизм (бодибилдинг) билан шуғулланиш жоиз. Фақат қуйидагилар талаб этилади:

1. Намозни ўз вақтида ўқиш, узрсиз кечиктирмаслик.

2. Авратни бегоналарга кўрсатмаслик (киндикдан тиззагача бўлган жой эркак киши учун аврат саналади. Машғулот пайтида бу аъзолар бировга кўрсатилмайди, шерикларининг ҳам мазкур аъзоларига қаралмайди).

3. Аёллар билан аралаш-қуралаш бўлиб кетмаслик. Машғулот ўтказиладиган хона алоҳида-алоҳида бўлиши, фитнага сабаб ҳолатлар содир бўлмаслиги шарт.

4. Қолаверса, инсон ўз тоқатидан ортиқча нарсага ўзини зўрламаслиги ҳам талаб этилади. Жумладан, ўта оғир тошларни кўтараман, деб ўзига жавр қилиш тўғри эмас.
Танани тез ўстирадиган, мускулларни ривожлантирадиган маҳсулотларни истеъмол қилишда эътиборли бўлиш керак. Фақат шариат рухсат берган, ҳалол-пок нарсаларни еб-ичиш жоиз. Соғлиққа зарарли бўлса, мумкин эмас.

Юқоридаги шартларни ҳисобга олган ҳолда културизм билан шуғулланиш жоиз саналади. Валлоҳу аълам!