Жунубни кўрган одам ғусл қилиши шартми? 12.01.2016
Савол:Ассалому алайкум, Аллоҳ сиздан рози бўлсин! Менинг бир саволим бор эди: эр-хотин жинсий алоқадан кейин ғусл қилмаган ҳолатида уларни бошқа одам кўрса, ўша одам ҳам ғусл қилиши шартми? Номақул савол берган бўлсам, узр!
Булим Оилавий7137
Ва алайкум ассалом. Жунуб одамни кўрган бошқа бир одам жунуб бўлмайди. Жунуб юз-қўлини ювиб, одамлар билан муомала қилиши, ҳатто таом ейиши, ичимлик ичиши мумкин. Агар ҳали ғусл қилмай яна аёлига қайтишни хоҳласа, орада таҳорат қилиб олса яхши бўлади.
Жунублик маълум ишлардан кейин содир бўлади. Баъзилар буни жуда қаттиқ олиб, жунуб бўлгач одамларга қорасини ҳам кўрсатмасликка ҳаракат қилишади. Мўминнинг асли пок. У жунублик билан нопок бўлиб қолмайди. Фақат бу ҳолатда вақтинча намоз ўқий олмайди, Қуръон тиловат қилмайди, масжидга кирмайди.
Хуллас, жунублик одамларга кўринишдан, у билан муомала қилишдан ман этмайди. Албатта бу зарурат юзасидандир. Жунубликдан сўнг имкон қадар тезроқ ғусл қилиб олинади. Зеро, жунуб инсон то ғусл қилиб олмагунича унга фаришталар яқинлашмаслиги ҳадиси шарифларда ворид бўлган. Шу боис, зарурат бўлмаса, жунуб ҳолда юрмаслик керак.Валлоҳу аълам!