Жонлиқни ким сўйганини билмаса нима қилиш керак? 08.02.2017
Савол:Ассалому алайкум қори ака! Бераётган жавобларингиз учун Аллоҳ сиздан рози бўлсин. Қори ака мусофирчиликдамиз. Кореада овқатланиш бўйича саволим бор эди. Ишхонада карейслар пиширган овқатни еймиз ва ҳамма ўзбеклар ҳам шу овқатлардан ейишади. Уларни орасида мол гўштли, қўй гўштли, товуқ гўштли таомлар ҳам бор. Шулар ҳалолми? Бу гўштлар қаерда ва ким сўйганини билмаймиз...
Булим Фиқҳ6961
Ва алайкум ассалом. Фиқҳ китобларида келтирилишича, жонлиқни сўювчи одам оқил, мусулмон ёки аҳли китоб бўлиши, сўйишда Аллоҳ таолонинг исмини зикр қилиши, сўйишни ният қилиши керак.
Бутпараст, оташпараст ва Аллоҳни инкор қилувчи киши сўйган жонлиқни ейиш мумкин эмас. Қассоб камида аҳли китоб – яҳудий ёки насроний бўлиши шарт. Сабаби мусулмон ёки китобийдан бошқалар Аллоҳнинг исмини зикр қилмайдилар, балки ўз бутлари номи билан жонлиқни сўядилар.
Чет элда юрган киши сўраб-суриштириб, ҳалол таом тайёрланадиган тамаддихоналарга киради. Агар бегона шароитда, асли ҳалол бўлган жонлиқларни ким сўйгани ноъмалум бўлса, у ҳолда эҳтиёт чораси кўрилади. Чунки, мўмин банда ҳаромга тушиб қолишдан қўрқиб шубҳали нарсаларни тарк этгани маъқул. Валлоҳу аълам!