Ва алайкум aссалом. Мусулмон одам ҳалол саналган, шариатга мувофиқ сўйилган ҳайвонлар гўштини ейиши мумкин. Сиз айтган ҳолатда бунинг аниқ ҳукмини айтиш қийин. Чунки Полша ёки Мўғулистондан келтирилган ичаклар қандай ҳайвонники, уларни ким томонидан, қандай ҳолатда сўйгани маълум эмас. Буни билмай туриб ҳалол ёки ҳаром деб бўлмайди. Шунинг учун бунақа вазиятда эҳтиёт тарафи олинади. Яъни, ҳалоллиги аниқ маҳсулотлар истеъмол қилинади, ҳаром, шунингдек, шубҳали нарсалардан сақланилади.
    Қази ва колбаса каби нарсаларни тайёрлашда ишлатиладиган ичаклар ўзимизнинг юртда ёхуд бошқа ҳарқандай мусулмон юртда сўйилган қўйлардан олинган бўлиши лозим деб ўйлаймиз. Чунки, аҳолиси мусулмон динига эътиқод қиладиган жойларда ҳайвонлар шаръий ҳалоллаб сўйилади ва ҳалол ҳайвон гўштлари истеъмолда асосий ўринни эгаллайди.
     Лекин, саволда тилга олинган ҳолат бизни бироз таажжубга солди. Биз қази тайёрлашда ўзимизда сўйиладиган қўйларнинг ичаги ишлатилишини билардик. Польша ёки Монголиядан келадиган ичаклардан тайёрланадиган қазилар ҳақида эшитмагандик. Эҳтимол, кимлардир шундай қилаётгандир. Лекин, мазкур эҳтимол туфайли юртимизда тайёрланган қазиларни еб бўлмайди дейдиган бўлсак, халқни жуда катта машаққат ва ҳаражга солиб қўйган бўламиз. Зеро, одамлар қази олаётганда қайси қази шаръий сўйилган қўйнинг ичагига солингану қайси бири Польша ёки Монголиядан келтирилган ичакка тиқилганини аниқ билмайдилар. Натижада одамлар ноқулайликларга дучор бўлиб қолишлари мумкин. Шунинг учун бу масалада аниқ билимга эга бўлмасдан қатъий бир ҳукмни айтиб бўлмайди. Агар кишида шундай гумон пайдо бўлиб қолса, энг яхшиси, диёнати жойида бўлган таниш инсонлардан харид қилиш мақсадга мувофиқ бўлади. Валлоҳу аълам